Бүгін Денсаулық сақтау министрі Алексей Цой жұмыс сапарымен Ақтөбе облысына барып, онда «Ақтөберентген» АҚ зауытының, облыстық перинаталдық орталықтың, онкогематология орталығының қызметімен және №1 қалалық емхананың жұмысымен танысты, сондай-ақ КВИ-мен күрес жөніндегі республикалық штабтың отырысын өткізді.
Эпидемиологиялық жағдайды талдау матрицасына сәйкес Ақтөбе облысы 2021 жылғы 9 шілдеден бастап «қызыл аймаққа» кірді, пандемия басталғаннан бері өңірде КВИ – дің 14 142 жағдайы тіркелді, бүгінде 2 490 пациент ем алуда, оның 503 – і стационарлық деңгейде, 1 987-і амбулаториялық деңгейде. 1 қаңтардан бастап Ақтөбе облысында 294 жүкті әйел КВИ-мен ауырды, бүгінде олардың саны 57-ді құрайды.
Облыста коронавирустық инфекциясы бар пациенттерге медициналық көмек көрсету үшін барлығы 24 инфекциялық стационар дайындалды. Қазіргі уақытта 18 стационар ашылып, жұмыс істеуде, 6 стационар резервте тұр. Инфекциялық стационарлардың жалпы төсек қоры 3603 төсекті құрайды, оның ішінде 401 реанимациялық төсек. Қазіргі уақытта облыста 795 төсек – орын бар, оның ішінде реанимациялық 115 төсек-орын, резервте 2808 төсек-орын бар.
«Ақтөбе облысындағы бүгінгі жағдай үлкен алаңдаушылық тудырып отыр, себебі, төсек-орындарға сұраныс одан әрі өссе, төсек қорының жетіспеушілігіне және тиісінше халық үшін стационарлық көмекке қолжетімділіктің төмендеуіне алып келуі мүмкін. Осыған байланысты, жергілікті атқарушы органдарға санитарлық-эпидемиологиялық қызметтің, құқық қорғау органдарының, ішкі саясат басқармасының және т.б. белсенді қатысуымен КВИ алдын алу және вакцинация мәселелері бойынша облыс тұрғындары арасында ақпараттық-түсіндіру жұмыстарын күшейту қажет», — деді А. Цой.
Министр Денсаулық сақтау басқармасына шұғыл түрде резервтік төсектерді орналастыруды және КВИ бар пациенттерді қабылдауға дайындықты қамтамасыз етуді, консультативтік топтың жұмысын жедел түрде ұйымдастыруды, нақты уақыт режимінде алғашқы медициналық көмек ахуалдық орталықтарының жұмыс істеуін қамтамасыз етуді, диагностика және емдеу хаттамасының сақталуын қамтамасыз етуді тапсырды.
